Teks Misa Pesta Salib Suci Menggunakan Bahasa Kampung Sawah


Perayaan Ekaristi - Foto : Bernardus Bagus

OMONGAN PERMULAAN

Nyanyian Permulaan. dan Arak-arakan/iring-iringan.

Omongan Permulaan.

Kita kudu bemegah dalem salib Tuhan kita, Yesus Kristus pangkal keslametan, keidupan ama kebangkitan kita, sumber penebusan ama pembebasan kita.

Tanda Salib.  (bediri)

I       Dalem Nama Bapa dan Putera dan Roh Kudus.
U      Amin.
I       Berkah Tuhan kita Yesus Kristus cinta kasih Allah dan kebersamaan Roh Kudus besertamu.
U      Dan sertamu juga.

Ucapan Pengiring.

I     Enya, Babe, ama sodara-sodara semuanya nyeng dikesianin ama Tuhan kita Yesus Kristus; Salib buat orang Yunani ama Yahudi jadi tanda kehinaan ama kebodoan. Namun, itu dia nyeng udah diterima Yesus dalem idup-Nya. Dia mati di kayu salib. Dalem artian emang salib jadi tanda keancuran. Besukur karna salib bukan pengabisan dari riwayat Yesus. Dia dibangkitin ama Bapa-Nya. Inilah nyeng ngasih arti baru buat salib sebagei tanda iman, pengarepan, ama cinta kasih. Pake salib itu, Yesus matahin kuasa maut ama dosa. Di balik kegelapan salib, besinarlah cahaya Paskah buat kita.

Doa Penyeselan  (sedeku)

I+U  Saya mao ngaku ama Allah nyeng Mahakuasa, juga ama sodara semua-bahwa saya emang udah bedosa pake pikiran ama omongan - pake perbuatan ama kelalaian - saya bedosa-saya bedosa saya emang bener-bener bedosa. Makanya saya minta - ama Santa Perawan Maria - ama malekat-malekat dan juga ama orang nyeng kudus dan juga ama sodara sodara semuanya, agar ngedoain saya pada Allah Tuhan kita.

I     Moga-moga Allah nyeng Mahakuasa kesian ama kita, ngampunin dosa kita ama nganterin kita ke idup nyeng kekal.
U    Amin.

Kemuliaan. (bediri)

Kemuliaan kepada Allah nyeng di sorga ama damei dibumi bagi orang nyeng bekenan kepada-Nya. Kita muji-muji Dikau, kita mao ngeluhurin Dikau, kitai mao nyembah Dikau, kita mao muliain Dikau, kita mao ngucapin syukur kepada-Mu, sebab kemuliaan-Mu nyeng gede. Ya Tuhan Allah, Raja Surgawi, Allah Bapa nyeng Mahakuasa, ya Tuhan Yesus Kristus anak-Nya nyeng cuman satu-satunya, Ya Tuhan Allah Anak Domba Allah, Putra Bapa. Engkau nyeng ngapus dosa dunya kesianin kita, Engkau nyeng ngapus dosa dunia kabulin doa kita, Engkau nyeng duduk di samping Bapa, kesianin kita. Karna cuman Engkau nyeng kudus, cuman Engkau Tuhan, cuman Engkau nyeng paling tinggi, ya Yesus Kristus. Bareng-bareng ama Roh Kudus dalem kemuliaan Allah Bapa, Amin.

Sembayang Permulaan.  (sedeku)

I.    Nyo kita sembayang. (diem bentaran)

Ya Allah, Engkau ngarepin Putra-Tunggal-Mu nanggung salib demi keslametan umat manusia. Ijinin kita, nyeng ngehormatin misteri salib Putra-Mu di dunia, nantinya nerima anugrah tebusan di sorga. Dengan pengantaraan Yesus Kristus Putra-Mu, Tuhan kita, nyeng sama-sama ama Dikau dalem persatuan Roh Kudus idup ama bekuasa, Allah, sepanjang segala masa.
U.  Amin.

LITURGI SABDA

Bacaan nyeng kesatu   (duduk)

Bacaan dari Kitab Bilangan (Bil. 21:4-9)

Tiap orang nyeng dipatok ula, kalo ngeliat ula tembaga, ia bakalan tetep idup

(L)  Seabis dia-pada brangkat dari gunung Hor, bejalan ke arah Laut Teberau buat ngiterin tanah Edom, maka bangsa itu kaga bisa lagi nahan ati di tengah jalanan. Terus dia-pada ngomong-ngomong ngelawan Allah ama Musa.” Ngapain lu-pada mimpin kita keluar dari Mesir? Biar kita pada mati di padang gurun ini? Karna di sini kaga ada roti ama kaga ada aer, ama bakalan makanan anta ini kita udah bosen.” Terus, Tuhan nyuruh ula-ula tedung ke tengah bangsa itu, nyeng matokin dia-pada, jadi banyak orang Israel nyeng pada mati. Terus dateng bangsa itu nemuin Musa ama ngomong, “Kita udah bedosa, karna kita ngomong-ngomong ngelawan Tuhan ama engkau; bedoalah ama Tuhan, biar ula-ula ini dijauhin-Nya dari kita. Terus Musa sembayang buat bangsa itu. Maka, befirmanlah Tuhan pada Musa,”Buatin ula tedung terus taro pada sebuah tiang; maka saban orang nyeng kepatok, kalo ia ngeliat ula itu bakalan tetep idup.

(L) Begitulah Sabda Tuhan.
(U) Syukur pada Allah.

Bacaan nyeng Kedua   (duduk)

Pembacaan dari Surat Rasul Paulus buat jemaat di Filipi. (Flp. 2:6-11)

Yesus ngerendahin diri, maka Allah sungguh ninggiin Dia.

L    Sodara-sodara, Yesus Kristus, meski dalem rupa Allah, kaga pernah nganggep sejejer ama Allah itu sebagei milik nyeng kudu dipertahanin. Sebaliknya, Dia udah ngosongin diri, ngambil tampang seorang hamba, dan mirip sama manusia. Dan dalem keadaan kaya manusia, Dia udah ngerendahin diri-Nya juga taat ampe mati, lebih-lebih ampe mati di kayu salib. Itu mangkanya Allah ninggiin bangat Dia, juga ngasih Dia nama di atas segala nama, biar di dalem nama Tuhan Yesus pada nyerah semua nyeng ada di langit, juga nyeng ada di atas juga di bawah kolong langit, dan buat kemuliaan Allah Bapa semua lidah pada ngakuin “Yesus Kristus itu Tuhan.”

L    Begitulah Sabda Tuhan.
U    Syukur pada Allah

Bait Penganter Injil       (bediri)

5  | 3 . 2 |  1    3    4  |  . 3    2   | 2    3   |  4    2  |  3   .  |  3 ||

Al- le   lu-  ya, al-  le-    lu- ya,    al-  le-    lu         ya.

Ya Kristus, kita nyembah ama muji-muji Engkau,
karna dengan salib-Mu, Engkau udah nebus dunia.

Bacaan Injil (bediri)

Ini dia Injil Yesus Kristus menurut Yohanes (Yoh. 3:13-17)

Anak Manusia kudu ditinggiin.

I     Dalem obrolan-Nya ama Nikodemus, Yesus bilang, “Kaga ada seorang juga nyeng udah naek ke sorga, selaen Dia nyeng udah turun dari sorga, yaitu Anak Manusia. Juga sama kaya Musa ninggiin ula di padang gurun, begitu juga Anak Manusia kudu ditinggiin, supaya orang-orang nyeng percaya ama Dia, bakalan ngedapetin idup nyeng kekal. Karna begitu gedenya kasih Allah ama dunia ini, sampe-sampe Dia udah ngaruniain Anak-Nya nyeng cuman satu-satunya, supaya orang-orang nyeng  percaya ama Dia kaga binasa, tapi ngedapetin idup nyeng kekal. Karna Allah ngutus Anak-Nya ke dalem dunia bukan buat ngadilin dunia, tapi buat nyelametinnya.

I     Begitulah sabda Tuhan.
U    Terpujilah Kristus.

Kotbah Pastur      (duduk)

Pengakuan iman      (bediri)

Saya percaya ama Allah, Bapa nyeng maha kuasa, nyeng nyiptain langit ama bumi, dan ama Yesus Kristus, Putra-Nya nyeng cuman satu-satunya, Tuhan kita, nyeng dikandung dari Roh Kudus, dilahirin oleh Prawan Maria, nyeng menderita, dalem pemerentahan Pontius Pilatus, disalib, mati, dan dikubur; nyeng turun ke tempat penantian, pada ari ketiga bangkit dari antara orang mati; nyeng naek ke sorga, duduk di samping kanan Allah Bapa nyeng maha kuasa; dari situ Dia bakalan dateng ngadilin orang nyeng idup ama orang nyeng mati. Saya percaya ama Roh Kudus, Greja Katolik nyeng Kudus, persekutuan para Kudus, pengampunan dosa, kebangkitan badan, keidupan kekal. Amin

Sembayang jemaat

I     Saking gedenya kasih Allah ama dunia ini, sampe-sampe Dia udah ngaruniain Anak-Nya nyeng satu-satunya buat nyelametin ama ngidupin kita oleh kematian ama kebangkitan-Nya. Nyo kita bedoa kepada-Nya supaya kita terus-terusan tebuka ama kasih-Nya.

L    Buat Gereja Kristus, Ya Bapa, bimbing ama tuntun terus Gereja-Mu supaya terus bejuang buat ngikutin salib suci Putra-Mu dengan terus-terusan ngebaruin diri. Nyo kita bedoa ama Dia...

U    Dengan Salib suci-Mu, Engkau udah nyelametin dunia.

L    Buat dia-pada nyeng idupnya belon terarah,

Ya Bapa, tuntun dia-pada nyeng masih pada nyari jalan idupnya biar nemuin Kristus sebagei jalan, kebeneran ama keidupan. Nyo kita bedoa ama Dia...

U    Dengan Salib suci-Mu, Engkau udah nyelametin dunia.

L    Buat dia-pada nyeng kaga pada punya temen ama nyeng ngurung diri,

Ya Bapa, terangin dia-pada nyeng terus-terusan nutupin diri biar mulain brani ngebuka ati buat persahabatan Kristus, nyeng bakalan bikin dia-pada bisa ngebuka diri buat orang laen juga. Nyo kita bedoa ama Dia...

U    Dengan Salib suci-Mu, Engkau udah nyelametin dunia.

L    Buat diri kita sendiri,

Ya Bapa, ajarin kita buat setia belajar dari Putera-Mu, Yesus, dalem manggul salib-salib kita dengan sabar ama rendah ati; moga-moga salib-salib itu ngebawa idup buat kita sendiri ama sesama kita. Nyo kita bedoa ama Dia...

U    Dengan Salib suci-Mu, Engkau udah nyelametin dunia.

I     Allah Bapa nyeng Maha Baik, Salib Suci Putra-Mu udah nyelametin dunia. Beri kita damei ama idup suci karna Salib Putra-Mu. Dialah Tuhan nyeng jadi pengantara kita.

U:   Amin.

LITURGI EKARISTI

Nyiapin sesembahan   (sedeku)

Sembayang buat nyiapin sesembahan   (sedeku)

I.    Ya Allah, kita minta supaya sesembahan di atas altar salib, nyeng udah ngapus dosa semua dunia, juga ngebersihin kita dari semua dosa. Liwat perantaraan Kristus, Tuhan kita.

U    Amin.

Prefasi   (bediri)

Doa Syukur Agung   (sedeku)

Anamnesis  

Bapa Kami   (bediri)

Embolisme    (bediri)

Mecahin Hosti ama Anak Domba Allah

Nyambut/Komini

Sembayang Taun Pelayanan,

Bapa kita di sorga, kita besukur karena Kau pilih kita buat idup besodara, saling ngebagi ama ngelayanin. Putra-Mu Yesus Kristus besedia ngambil rupa seorang hamba. Cinta Kasih-Nya agung ama mulya. Ia redho mati di kayu salib buat ngelayanin keslametan jemaat. Bimbing kita ama Roh Kudus-Mu supaya kita tekun ngewujudin pengajaran-Nya, supaya bebela rasa buat nyeng sengsara, supaya kita ngelayanin secara tulus ama gumbira. Tuntun kita supaya bisa ngebagiin harta, talenta, waktu, ama tenaga buat ngewujudin pelayanan penuh kasih buat sesama nyeng lemah, kecil, miskin, ama kesingkir. Bunda Maria, Bunda kita, doain kita biar bisa ngelayanin, diresapin semangat pelayanan Putra-Mu. Demi Kristus Tuhan ama pengantara kita. Amin.

Sembayang abis nyambut  (sedeku)

I     Nyo kita sembayang:      

Allah Bapa nyeng ada di sorga, Engkau udah muasin kita pake santapan kudus. Kita minta dengan rendah ati: supaya kita nyeng udah Engkau tebus pake kayu salib Putera-Mu nyeng ngidupin, Engkau ikut sertakan juga dalem kemuliaan kebangkitan-Nya. Karna Dialah Tuhan ama Pengantara kita selama-lamanya.

U    Amin.

RITUS PENUTUP

Pengumuman

Berkat Penutup           (seduku)

Pastur ngebentangin tangan

I     Tuhan bersamamu
U    Dan bersama rohmu

Pastur ngulurin dua tangannya ke jemaat

I     Moga-moga Allah, sumber segala penghiburan, mao ngatur idup sodara didalem damai-Nya ama ngelimpahin sodara sama berkat-Nya
U    Amin

I     Moga-moga Allah ngebebasin sodara dari semua kegundahan ama neguhin ati sodara didalem kasih-Nya.
U    Amin

I     Moga-moga sodara jadi kaya dalem iman, pengarepan ama kasih, dan bisa ngegunain keidupan di dunya ini buat nyeng bae-bae hingga nanti boleh begembira abadi di sorga
U    Amin

I     Moga-moga sodara semua dilindungin, dibimbing, ama diberkatin Allah nyeng maha kuasa: Bapa, Putra ama Roh Kudus.
U    Amin

I     Pegilah kita diutus
U    Sukur pada Allah.

TEKS LAGU

Lagu-lagu gerejawi gaya Betawi gubahan Marsianus Balita:

Pembukaan: Seluruh Jemaat Datanglah (Download Teks)
Persembahan: Trimalah ya Tuhan (Download Teks)
Penutup: Cik Abang Rajin Sembahyang. (Download Teks)

Ordinarium:

Tuhan Kasihanilah Kami, (Download Teks)
Kemuliaan, (Download Teks)
Kudus, (Download Teks)
Anak Domba Allah (Download Teks)

Woiii, umat Paroki Servatius. Kalo pada punya berita apa kek, poto apa kek, kegiatan apa kek, mao nyang lingkungan, apa nyang kategorial bisa ditongolin di media, kirim aja ke : parokisantoservatius@gmail.com

 :